divrec'h

Brezhoneg

Etimologiezh

(Furm anv-kadarn) Diwar an anv-gwan pegementiñ div hag an anv-kadarn brec'h, da geñveriañ gant ar ger kernevveurek dywvregh.

(Furm verb) diwar divrec'h-, pennrann ar verb divrec'hañ, hep dibenn-ger.

Furm anv-kadarn

divrec'h /ˈdiwvrex/ /ˈdivrex/ daouder benel (furm vihanaat : divrec'hig, liester : divrec'hioù)

(Korfadurezh) Daouder an anv-kadarn brec'h
- — O ! me 'ouie ervat », eme ar wreg, « oac'h kristenien vat ha n'ho pije ket graet un intañvez ac'hanon, gant pevar minor war va divrec'h. [...]. — (Lan Inizan, Emgann Kergidu 1, Brest, 1877, eil emb. Al Liamm 1977, p. 90.)
- Anaout a riz dioc'htu Herve Soutre, flastret he benn, ha Katel Eukat, he daou vugelik gant-hi etre he divreac'h. — (Lan Inizan, Emgann Kergidu Lodenn 2, J.B. hag A. Lefournier, Brest, 1878, p. 53.)
- Rak, ma ne oa ket ar baraer ur gwall zen, ur c'haer a zen e oa, ha gant nerzh ur marc'h en e zivrec'h. — (Jakez Riou, An Ti Satanazet, Skridoù Breizh, 1944, p. 88.)
- Daoust da se, strivañ a ra da stardañ he divrec'h e-dro d'he mabig ; [...]. — (Jarl Priel, Va Zammig Buhez, Al Liamm, 1954, p. 45.)
- — « Mamm, bronn din, » eme ar skilbaotr, ken tev e zivesker hag e zivrec'h ha postoù ur gwele-kloz, ha ken bras e benn hag ur girin da lakaat dienn. — (Troude ha Milin, Labous ar Wirionez ha Marvailhoù all, Skridoù Breizh, 1950, p. 69.)
- Me am-bez poan em divreh. — (Jules Gros, Le trésor du breton parlé Deuxième Partie, 1970, p. 64.)
- [...], ha neuze, sioulaet dezhañ, e teue etre ma divrec'h da zisoñjal e stultennoù ha da vezañ evurus. — (Pêr Denez, Glas evel daoulagad c'hlas na oant ket ma re, Al Liamm, 1979, p. 23.)
- Pa dremenfet e-kichen ar c'hannerezed-noz, bezit didrouz ha mut ; rak mar tireizhit (!) o labour, c'hwi a zleo reiñ dezhe skoazell da weañ ar gannadenn, ha gwazh d'ho tivrec'h. — (Erwan Berthou, En bro Dreger a-dreuz parkoù, Mouladurioù Hor Yezh, 1985, p. 29.)
- Gant e zivrec'h e poueze war e gomzoù. — (Goulc'han Kervella, Brezel ar Rigadell, Al Liamm, 1994, p. 40.)

Stummoù all

div vrec'h

Doareoù-skrivañ all

Skrivet ivez divvrec'h

En doare-skrivañ etrerannyezhel e vez skrivet diwvrec'h, diw vrec'h.

Troidigezhioù

galleg : (paire de) bras ^(fr)
kerneveureg : dywvregh ^(kw)
saozneg : arms ^(en)

Furm verb

divrec'h /ˈdivrex/

Furm ar verb divrec'hañ e trede gour unan an amzer-vremañ, en doare-disklêriañ.
Furm ar verb divrec'hañ en eil gour unan an doare-gourc'hemenn.