dont a-benn da ober un dra bennak
Brezhoneg
|
Sellet e vez ouzh ar bajenn pe ar gevrenn-mañ evel un divraz da glokaat e brezhoneg. Mar gouezit tra pe dra diwar-benn danvez ar pennad e c'hellit lakaat ho kouiziegezh da dalvezout dre gemmañ ar bajenn-mañ diouzhtu goude klikañ war al liamm « kemmañ ». |
Etimologiezh
- Eus dont a-benn hag ober un dra bennak
Troienn verb
dont a-benn da ober un dra bennak /Distagadur ?/
- Seveniñ ar pezh a oa bet raktreset, tizhout e bal
- Ober a rafe ar vicher-se betek kaout e leve... ma teu a-benn da vevañ betek an deiz-se. — (Vefa de Bellaing, Ar peskig ruz, Al Liamm niv. 178, Gwengolo-Here 1976, p. 310.)
- N'ouzon ket ! ha biken ne zeuin a-benn da c'houzout kement-se, kent ne vin adarre, kwita mammig, tal ouzh tal ganeoc'h ? — (Jarl Priel, Va Zammig Buhez, Al Liamm, 1954, p. 45.)
- ..., ha na oamp deut morse a-benn da c'houzout skoed piv e oa. — (Pêr Denez, Glas evel daoulagad c'hlas na oant ket ma re, Al Liamm, 1979, p. 18.)
- Bez gwenn ha flamm e ziavaez, ha brein e ziabarzh : dont a ra a-benn da wiskañ hetus ar Pec'hed Hudur ! — (Youenn Drezen, Sizhun ar Breur Arturo, Al Liamm, 1971, p. 17.)
- "Mar deo deut Reune Penneg da gerc'hat ac'hanout a-greiz an noz eo dre m'eo deut a-benn da gaout aotre e dad hag e vamm, hag e fell dezhañ skeiñ war an tomm. — (Anatol ar Braz, lakaet e brezhoneg gant Erwan ar Moal, Mojenn an Ankou, Mouladurioù Hor Yezh, 1986, p. 95.)
- [...], an daou vloaz kentañ, e voe dister ar c'hounidegezh ha ne zeujomp a-benn nemet da gaout hor boued. — (Daniel Defoe, lakaet e brezhoneg gant Yeun ar Gow, Abrobin, Al Liamm, 1964, p. 13.)
- N'on deut a-benn da gompren da vat an dra-se nemet war va gwele ospital er miz diwezhañ, ... — (Abeozen, Pirc'hirin Kala-Goañv, Al Liamm, eil emb. 1986, p. 22.)
- Ha pa gomzfen ac'hann da warc’hoazh ar beure ne c’hallfen ket dont a-benn da laret holl. — (Fañch an Uhel, Kontadennoù ar Bobl/1, Al Liamm, 1984, p. 30.)
- — Mes penaos e fell deoc'h e teufen a-benn d'hen lazhañ, Priñsez, pa nij kuit kerkent ha ma wel ac'hanon ? — (Fañch an Uhel, Kontadennoù ar Bobl/1, Al Liamm, 1984, p. 20.)
- Ne oa ket deuet a-benn da lazhañ ar paotrig-se. — (J.K. Rowling, lakaet e brezhoneg gant Mark Kerrain, Harry Potter ha Maen ar Furien, An Amzer embanner, 2012, p. 17.)
- « Ha soñjal a ra deoc'h e teuio a-benn ar Flavig vras d'ober e labour ? » a c'houlennas Yann Gonideg. — (Youenn Kervalan, Dremmoù Arrasate, Embannadurioù Al Lanv, 2009, p. 22.)
- Liv an deiz zoken a seblante kaout poan o treuziñ gwerennoù ur prenestr, outañ stalafioù ha na oa ket deuet a-benn da serriñ en derc'hent. — (Roparz Hemon, Ho kervel a rin en noz ha marvailhoù all, Al Liamm, 1970, p. 17.)
- Neuze e kerzhe dinec'h dezhañ en ur dourtal ha, pa ne zeue ket a-benn d'e doullgofañ gant e gernoù, e rae dezhañ kemerout an tec'h. — (Yeun ar Gow, E Skeud Tour Bras Sant Jermen, eil emb. Al Liamm, 1978, p. 23.)
- Dre boan hag a-nebeudoù e teuas a-benn, gant harp ar porzhier, da vountañ ar glemmerien er-maez eus ar sal-guzul [...]. — (Goulc'han Kervella, Brezel ar Rigadell, Al Liamm, 1994, p. 19.)
- — [...]. Mar ne zeuez ket a-benn da brouiñ da damalloù e-keñver va mamm, da vamm-te an hini eo a vo losket ; ha te, mic'hiek, war un dro ganti. — (Langleiz, Romant ar Roue Arzhur/levrenn I : Marzhin, Al Liamm, 1975, p. 24.)
- Dre « internet », e teue a-benn ivez da brenañ un tamm butun-drol bennak, ha bremañ gant an ADSL ec'h ae buanoc'h an traoù. — (Fañch Peru, Kañfarded Milin ar Wern, Skol Vreizh, 2008, p. 13.)
- Daoust da se, ne zeuis ket a-benn an deiz-se da zibluañ va c'hlujar, ur c'hozh kabiten war al listri-kenwerzh, rak na zoken un diner n'am boa distaget dioutañ. — (Jarl Priel, Va Buhez e Rusia, Al Liamm, 1955, p. 11.)
- [...] ; diwar neuze den ne zeuas a-benn d'ober tra gant ar vrigadenn-se na dalveze ket, emezo, ul louf-bleiz ha dalc'hmat o klemm pe o tamall. — (Jarl Priel, Amañ hag Ahont, Al Liamm, 1957, p. 29.)
- « Biken ne c'hellin dont a-benn da heñchañ ar vag pounner-mañ ; nann biken. » — (Jakez Riou, An Ti Satanazet, Skridoù Breizh, 1944, p. 95.)
- Dont a ra a-benn da dapout an evnig. — (Fañch an Uhel, Kontadennoù ar Bobl/3, Al Liamm, 1988, p. 137.)