strizh

Brezhoneg

Sellet e vez ouzh ar bajenn pe ar gevrenn-mañ evel un divraz da glokaat e brezhoneg. Mar gouezit tra pe dra diwar-benn danvez ar pennad e c'hellit lakaat ho kouiziegezh da dalvezout dre gemmañ ar bajenn-mañ diouzhtu goude klikañ war al liamm « kemmañ ».

Etimologiezh

Amprestet digant al latin strictus (en deus roet ar ger gallek estreit a zo aet da étroit).^[1]

Anv-gwan

Derez	Furm
Derez-plaen	strizh
Derez-uheloc'h	strishoc'h
Derez-uhelañ	strishañ
Derez-estlammiñ	strishat

strizh /ˈstriːs/

1. Nebeut a ledander dezhañ.
   • Gwir eo e tleas sebeziñ ar skrivagner a oa pastor en ur vro brotestant, e-lec'h ma 'z eo strizh ar speredoù pa vez meneg eus ebatoù, ha kement-se, moarvat, eo hen dougas da ziskleriañ e oa gouest ur seurt dañs da strafuilhañ un den santel. — (Yeun ar Gow, E Skeud Tour Bras Sant Jermen, eil emb. Al Liamm, 1978, p. 38.)
   • En toull an hent-ze, e oa diou roc'hell vras, etreze eun tammig gwenojenn striz ha moan — (Erwan ar Moal, Pipi Gonto, Kemper, 1925, p. 7.)
   • Heuliañ a raent ur riboul strizh, toullet a-dreuz al linad uhel diwanet war atredoù mogerioù disac'het an iliz hep dor na toenn. — (Youenn Drezen, Sizhun ar Breur Arturo, Al Liamm, 1971, p. 54.)
   • O ! ar bugel-se a zo strizh ! — (Jules Gros, Le trésor du breton parlé Deuxième Partie, 1970, p. 496.)
   • An hent-se, a zo eun tamm brao strisoc'h eget na doa siminal an ti-soul : ne da ket treid saoud dezan. — (G. MILIN, Gwechall-goz e oa..., Kemper, 1924, p. 88.)
   • Va mamm-gozh a oa ur vaouezig strizh ha treut-ki, met daoust da se ken nerzhus hag un aneval, ha buhez enni evel n'hoc'h eus gwelet biskoazh ; ... — (Jarl Priel, Va Zammig Buhez, Al Liamm, 1954, p. 11.)
   • ..., hag aluzon am eus marteze oc'h anzav pegen berr e veze ar peuriñ ganin e-pad va yaouankiz, ha dre beseurt hentoù strizh am eus ranket ruzañ a-wechoù. — (Jarl Priel, Va Buhez e Rusia, Al Liamm, 1955, p. 1.)
   • Setu amañ poltred pep hini anezho : Job a oa bihan, Lom a oa bras ; Job a oa ledan ha skoulmet-kaer, Lom a oa strizh e zargreiz ha strizh e zivskoaz ; Job en doa blev du ha Lom blev ruz. — (Jakez Riou, An Ti Satanazet, Skridoù Breizh, 1944, p. 26.)
2. bezañ strizh ouzh unan bennak → Termenadur da glokaat (Ouzhpennañ)
   • Me ne vin ket re strizh outi,
     Hag en hent-se e vo peoc'h en ti. — (Yann-Vari Perrot, E-tal ar poull, C'HOARIVA BREZHONEK, Pemp pezh-c'hoari berr, Skridoù Breizh, 1944, p. 56.)
3. (Yezhadur) A ra dave d'un dra resis.
   • Ar ger-mell strizh.

Gerioù enepster

• amstrizh (2)
• ledan (1)

Gerioù kevrennek

• strizh-douar
• strizh-gar
• strizh-mor

Deveradoù

• amstrizh
• distrizhañ
• strishaat
• strishadenn
• strishadur
• strizhadur
• strizhañ
• strizhder
• strizhenn
• strizhkredenn
• strizhkredennour
• strizhkredik
• strizhkredennouriezh

Troioù-lavar

• bezañ strizh war un dra bennak

Troidigezhioù

N'eo ket ledan (1)

• alamaneg : schmal ^(de)
• esperanteg : mallarĝa ^(eo)
• galleg : étroit ^(fr)
• saozneg : narrow ^(en)

Yezhadur (2)

• alamaneg : bestimmt ^(de)
• esperanteg : difina ^(eo)
• galleg : défini ^(fr)
• saozneg : definite ^(en)
• italianeg : definito ^(en)

Anv-kadarn

strizh /ˈstriːs/ gourel (liester : strizhoù)

1. Strizh-mor
   • Kenderc'hel a raemp e-keit-se gant hon hent, ha goude treuziñ striz-mor Kattegat, kerkent ha ma tifourkas ar Vérité e raz Sund e teuas a-wel d'ar gêrig Helsingaër, Elsinore, hervez ma rae diouti Gwilherm Shakespeare. — (Jarl Priel, Va Zammig Buhez, Al Liamm, 1954, p. 154.)

Troidigezhioù

• galleg : détroit ^(fr)

Adverb

strizh /ˈstriːs/

1. Hep bezañ kevatal.
   • Brasoc'h-strizh, bihanoc'h-strizh.
2. Groñs.
   • Dre se 'ta e voe bet difennet strizh d'hor martoloded mont da vale kêr, ... — (Jarl Priel, Va Zammig Buhez, Al Liamm, 1954, p. 183.)
   • Degouezhet eo din folennata levrig lezennoù-arme ar Rusianed ha hervez unan eus ar c'hevrennoù kentañ « difennet strizh e oa skeiñ gant ar soudarded ». — (Jarl Priel, Amañ hag Ahont, Al Liamm, 1957, p. 31.)

Troidigezhioù

• galleg : strictement ^(fr)

Daveoù

Roll an daveoù :

• ^[1] : Lexique Étymologique des termes les plus usuels du Breton Moderne