pouezañ

Brezhoneg

Etimologiezh

Savet diwar an anv-kadarn pouez hag al lostger -añ

Meneget er C'hatolikon (poesaff).

Da geñveriañ gant ar verboù pwyso en kembraeg, posa en kerneveureg.

Verb

pouezañ /ˈpweːzã/ verb kreñv eeun (anv-gwan-verb : pouezet) (displegadur)

1. Muzuliañ pouez un dra bennak
   • Pouezet ho-peus ar pesked ? — (Jules Gros, Le trésor du breton parlé Deuxième Partie, 1970, p. 426.)
2. (Difetis) Priziañ, muzuliañ talvoudegezh un dra bennak.
   • — Ober a rin va zonj dizale, p'am bo bet amzer da boueza ha da ziboueza hoc'h aliou. [...]. — (Ivon Krog, Eur Zac'had Marvailhou, Buhez Breiz, Kemper, 1924, p. 22.)
   • Piou a c'hallo biken poueza e balans ar vuhe talvoudegez eur vennoz (?) a garante war spered ha war galon eun den yaouank. — (Fañch al Lae, Bilzig, Kemper, 1925, p. 180.)
   • « [...]. Poueza a rit en ho tourn ar mad hag an droug, ha gouzout a rit e pe du emañ ar wirionez. [...] ». — (Jakez Riou, Troiou-Kamm Alanig al Louarn I, Gwalarn niv. 89, Ebrel 1936, p. 53.)

pouezañ war verb kreñv dieeun

1. Gwaskañ (fetis pe difetis).
   • Gant an torfedou niverus a boueze war e goustiañs, Alanig ne gare ket nemeur dont da renta kont eus e daoliou kamm d'e enebourien douet. — (Jakez Riou, Troiou-Kamm Alanig al Louarn I, Gwalarn niv. 89, Ebrel 1936, p. 9.)
   • Pa bouezan war ma dant klañv, hennez a ro eur vazad din-me ! — (Jules Gros, Le trésor du breton parlé Deuxième Partie, 1970, p. 427.)
2. Distagañ e doare da sachañ evezh war ur ger, ur gomz ...
   • Santez Roza enn eur brezeg a boueze var ar zentidigez a dle ann holl gristenien d'ar pab. — (Gabriel Morvan, Buez ar Zent, Brest, 1894, p. 609.)
   • Pa lavaran deoh, emezañ, hag hennez a boueze war e her, evel-se.... — (Jules Gros, Le trésor du breton parlé Deuxième Partie, 1970, p. 427.)

pouezañ verb gwan

1. Bezañ ur pouez bennak ennañ.
   • Ar skeuden a boueze eiz pe nao c'hant lur. — (Yann-Vari Perrot, Erwan ar Moal, Bue ar Zent, Montroulez, 1912, p. 585.)

Stummoù all

• poueziñ

Doareoù-skrivañ all

En doare-skrivañ etrerannyezhel e vez skrivet pouesañ.

Deveradoù

• pouezerez
• pouezerezh
• pouezus

Gerioù kevrennek

• dibouezañ

Troioù-lavar

• mont da zebriñ bara pouezet
• pouezañ butun
• pouezañ war droad

Troidigezhioù

Muzuliañ pouez un dra bennak

• esperanteg : pesi ^(eo)
• galleg : peser ^(fr)
• italianeg : pesare ^(it)
• katalaneg : pesar ^(ca)
• kembraeg : pwyso ^(cy)
• kerneveureg : posa ^(kw)
• saozneg : to weigh ^(en)
• spagnoleg : pesar ^(es)

Gwaskañ

• afrikaans : druk ^(af)
• alamaneg : drücken ^(de) (auf etwas ~), betätigen ^(de)
• esperanteg : premi ^(eo)
• galleg : appuyer ^(fr)
• saozneg : to push ^(en) , to press ^(en)

Bezañ ur pouez bennak ennañ

• esperanteg : pezi ^(eo)
• galleg : peser ^(fr)
• saozneg : to weigh ^(en)